Júróvisjón yfirferð - Norðurlönd

Í tilefni af uppskeruhátíð kítssins er ekki úr vegi að renna yfir lögin í ár. Fyrst kíkjum við á lögin sem koma frá Norðurlöndunum.

 Svíþjóð

Það má með með sanni segja að Abba hafi eyðilagt margar kynslóðir af sænskum Júróvísjón-listamönnum. Enn eitt árið senda þeir sama atriðið. Svona tónlist mundi aldrei heyrast utan SES og raunar er það ánægjulegt að gengi hennar innan keppninnar hafi verið þverrandi að undanförnu. Einhvern tímann sendu Slóvenar svona aríupopp í keppnina og þá var mikið hlegið og hneykslast yfir frændsemi nágrannþjóðanna, sem kusu það af áfergju.

Áður en einhver slysast til að kjósa þetta lag, ætti sá kannski að spyrja sig, "Mundi ég skella þessu á iPoddinn minn?"

 

 

Danmörk

Danir hafa alltaf rakað inn stigum frá Íslandi, sama hve ömurleg lög þeir senda. Þannig fékk dönsk 50s eftirherma fullt hús stiga frá Fróni í fyrra fyrir lag sem engin hefði tekið eftir ef Lithái hefði flutt það.

Nú í ár stretsa Danir enn velvildina með lagi sem er svo leiðinlegt að þornandi málning á loftinu heima hjá  Bon Jon Jovi hefði getað samið það, en Ronan Keating af henni ómakið.

Illa sungið þar að auki, hryllingur. 

 

Noregur

Loftfiðlusigurinn frá því í fyrra hefur skilað sér í fleiri flytjendum sem mun þykjast spila á þetta ágæta hljóðfæri. Það er nú ekki hægt að taka það af honum Pétri Pan frá Noregi að þetta er ekki illa af sér vikið. Fiðluparturinn kemur ágætlega inn í lagið og þetta á vonandi eftir að gera góða. Persónulega er þetta samt ekki alveg minn kanínuhattur, aðeins og mikill Grimmsbræðrabragur á þessu.

 Hérna er vidjóið frá fyrstu æfingunni.

 

 

Finnland

Myndbandið við þetta lag er sæmilega flott. Liggjandi-maður-að-syngja hughrifin komast alltaf til skila. Minna mig á Radiohead lagið Just. "Af hverju liggur hann, af hverju liggur hann?" getur áhorfandinn spurt sig í þrjár mínútur.

 Þetta er tvímælalaust nógu metnaðarfullt til að fá að renna með endakreditunum á einhverri evrópskri hasarkvikmynd. Ekkert að þessu lagi.

Hins vegar efast ég einhvern vegin að stemningin í myndbandinu komi sér á sviðið í moskvu. Mér virðist lagið missa töluvert af því að fari yfir í live-flutning með tilheyrandi, hliðar-saman-hliðar dansatriði.

Þetta Waldo's People lítur samt út fyrir að vera alvöru hljómsveit, sem er alltaf plús í kladdann.

 

 Ísland

 Jæja, þá kemur Alþingi og hirðir af mér ríkisborgararéttinn. Lagið "Is It True" gæti hugsanlega á góðum degi ratað inn á B-hlið á Dido-smáskífu. Sem er í sjálfu sér ekki neikvætt. Dido er prýðislistamaður.

Ég líkt og margir aðrir greip ekki viðlagið fyrr en í 5. eða 6. hlustun, það er ekki vænlegt til árangurs í svona keppni. Líklegast er lagið samt einhvers staðar um miðbik þess undanriðils sem það keppir í og gæti komist áfram þannig séð, en við verðum að muna að til að svo verði verður sæmilegum hópi fólk þetta finnast BESTA lagið í keppninni, og það er því miður ólíklegt er að svo verði.