Stofnanabundnum fordómum í garð ungs fólk linnir ekki

Sú niðurstaða Persónuverndar að heimilt sé að afhenda foreldrum lögráða fólks upplýsingar og persónulega hagi þeirra er hneisa. Það haldreipi sem notast er við kemur úr "barnalögum" og fjallar um að sýslumaður geti undir ákveðnum skilyrðum skyldað foreldri til að fjármagna menntun fólks undir tvítugu er veikt og kjánalegt.

 Nánar til tekið segir í úrskurðinum:

Samkvæmt 1. mgr. 1. gr. lögræðislaga nr. 71/1997 verður fólk lögráða 18 ára að aldri. Í samræmi við það lýkur þá framfærsluskyldu foreldra. Af löggjöf verður ráðið að engu að síður geti ákveðnar skyldur hvílt á foreldrum gagnvart börnum sínum eftir þetta tímamark. Í samræmi við það kemur fram í 62. gr. barnalaga nr. 76/2003 að sýslumaður geti úrskurðað foreldri til að greiða barni sínu framlag til menntunar eða starfsþjálfunar samkvæmt kröfu þess frá 18 ára aldri og allt til þess er það nær 20 ári aldri.

Þetta er siðan notað til að rökstyðja að foreldri hafi lögmæta hagsmuni af að fá að vita skólasókn barna sinna. Slíkt er auðvitað fremur hæpið án þess að slíkur úrskurður hafi farið fram. Og ekki veit ég til að margir slíkir úrskurðir fari fram ár hvert.

Síðan er þessi skilyrta framfærsluskylda til tvítugs auðvitað sett inn til að vernda hagsmuni fólks á aldrinum 18-20 ára en ekki til að rýra persónuvernd þess. Ég efast stórlega um að það yrði niðurstaða persónuverndar ef um einhverja aðra hópa væri að ræða, að einhverjar fræðilegar skyldur eins aðila á hendur öðrum veiti honum rétt til að hnýsast um öll hans mál. Fáranlegt.

Að lokum er það síðan það versta í þessu að verið að stofnanabinda uppeldi og um leið eyðileggja fyrir góðum samskiptum milli fullorðins fólks.  Rétta leiðin að þessu er auðvitað að halda við þeim sjálfviljuga sið að foreldrar hýsi afkvæmi sín gegn því að fá að skoða einkunnir þess og mætingu. En nei, þá þyrfti fólk að fara tala saman og það er svo óþægilegt. Látum bara gluggapóstinn frá opinberri stofnun duga.

Mátti ekki veita foreldrum upplýsingar um mætingu